Разам з назіраемай забаўляльна-канцэртнай актыўнасьцю адбываецца плянавы перадвыбарчы ўвод новых аб’ектаў сацыяльнай, моладзевай і гарадзкой інфраструктуры ў Жодзіне - 29.06.2008г. адбывалася шумнае музычнае прадстаўленьне з канцэртам на адкрытае пляцоўцы ля новага будынку ўчасе адкрыцьця Моладзевага цэнтру для будучае працы творчых майстэрняў, сацыяльных пэдагогаў з моладзьдзю, а таксама дзейнасьці “правільных” праўрадавых моладзевых структураў БРСМ-”Касталія”.
Цяжка не заўважыць скаардынаваны характар падобных піар-мерапрыемстваў, якія распачаліся адразу па ўсёй краіне.
Так, у суседнім Лагойску кіраўніцтва раённай адміністрацыі пачало, па сутнасьці, схаваную, але вельмі актыўную агітацыйную кампанію правядзеньнем:
1) урачыстага адкрыцьця новай цэнтральнай крамы 27.06.2008,
2) дня моладзі разам з БРСМ 28.06.2008,
3) спартовай эстафэты сярод прадпрыемстваў на прызы адміністрацыі 29.06.2008.
У Жодзіне таксама, улады актыўна рыхтуюцца да адзначэньня дня незалежнасьці 03.07.2008г., дзе будзе дамінаваць зялёна-чырвоная атрыбутыка з агульнымі для ўсіх праўрадавых кандыдатаў у дэпутаты палітычнымі слоганамі - “ЗА БЕЛАРУСЬ!”, “МЫ – БЕЛАРУСЫ!” Улічваючы, што ўлады ідуць на выбары пад сьцягам арганізацыйнай структуры “БЕЛАЯ РУСЬ” (асацыюецца й па сэнсе тоесна зь “Беларусь”), усе дадзеныя мерапрыемствы падсьвядома ўспрымаюцца выключна ў прапагандыска-перадвыбарчым альбо агітацыйным кантэксьце.
Прэзентуючы, такім чынам, сапраўдны “парад” уводу новых аб’ектаў сацыяльна-грамадзкай і гарадзкой інфраструктуры (натуральна, за бюджэтныя сродкі), ставіцца мэта выклікаць адпаведныя станоўчыя эмоцыі выбарнікаў і прадставіць уладу (будучых праўрадавых кандыдатаў) у кантэксьце бурных станоўчых пераўтварэньняў.
Такім чынам, можна назіраць слаба схаванае заўчаснае распачынаньне выбарчае кампаніі праўрадавай структуры “Белая Русь” і аказаньне ёй у гэтым схаванае падтрымкі з боку ідэалягічных адзьдзелаў выканкамаў, дзяржаўных СМІ і бюджэтных сродкаў …
Зьвярнула на сябе ўвагу і праца афіцыйных СМІ. Перад абвяшчэньнем выбараў па АНТ (афіцыйных каналах тэлебачаньня) прайшла сэрыя фільмаў, якія стваралі атмасфэру страху і недаверу непасрэдна да праваабаронцаў, грамадзкай супольнасьці й няўрадавых арганізацыяў, незалежнага назіраньня навогул.
Праваабронцаў і незалежных назіральнікаў прадстаўлялі як пасобнікаў і наймітаў “захаду”, якія нясуць небясьпеку грамадзкаму міру і стабільнасьці… У дзень абвяшчэньня выбараў той жа тэлеканал прадстаўляў трыбуну для выказваньняў Прэзыдэнта РБ Лукашэнкі A.Р., кіраўніка праўрадавага палітычна-ідэалягічнага ўтварэньня “Белая Русь” (міністр адукацыі сп. Радзькоў), прамова якога насіла відавочна рэклямны перадвыбарчы характар. Заяўлялася пра тое, што “Белая Русь” пойдзе на выбары шырокім фронтам (і ў камісыі, і - вылучаючы кандыдатаў у дэпутаты ПП НС РБ), а пасьля перамогі й канчатковага фармаваньня Парлямэнту, арганізацыя абвесьціць сябе палітычнай партыяй …
Наступным, у кантэксьце выбараў, паказвалі выступ намесьніка міністра МУС РБ Канапацкага, які на фоне сцэнаў вучэньняў спэцназу (з шчытамі і дубінкамі супраць грамадзянаў у штацкім) абвяшчаў пра тое, што сілавікі рыхтуюцца і яны не дапусьцяць масавых беспарадкаў у краіне …
У СМІ гучалі выказваньні Прэзыдэнта РБ пра тое, што выбары будуць на самым вышэйшым роўні - нават, паказальныя для іншых краінаў. Пасьля старшыня ЦВК Лідзія Ярмошына падмацавала дадзены аптымізм прыкладам таго, што адпаведна з Дэкрэтам (які забясьпечвае шырокі ўдзел партыяў у выбарах) кожная партыя можа вылучыць 1-го прадстаўніка у ЦВК з правам дарадчага голасу.
Пры гэтым, шматлікія эмацыйныя заявы ў СМІ проста стваралі ўражаньне (для звычайнага гледача), што партыям і апанэнтам улады дазволена мець ледзь не па 1-му паўнавартаснаму прадстаўніку ў кожнай выбарчай камісыі.
Аднак, пры азнаямленьні з самім дакумэнтам, аказалася, што дадзены Дэкрэт цалкам дублюе Указ №7 з 2004 году, а прадстаўнікі ў ЦВК ня маюць нават права ўдзельнічаць у праверках ды нейкім чынам уплываць на вынік галасаваньня ўчасе прыняцьця рашэньняў у ЦВК.
Мэханізм фармаваньня ўсіх іншых камісыяў – застаўся ў руках выканаўчае ўлады. А ў іхны склад, звычайна, уводзяцца спэцыяльна адфільтраваныя, падпарадкаваныя па вэртыкалі чыноўнікі й цалкам залежныя ад улады супрацоўнікі дзяржустановаў. Так улада цалкам кантралюе выбарчы працэс на ўсіх стадыях да выніковага падліку галасоў.
І як звычай, такім чынам зфармаваныя камісыі працуюць у рэжыме закрытасьці – назіральнікі пазбаўлены магчымасьці назіраць дынаміку лічбаў прагаласаваўшых учасе папярэдняга галасваньня ці ў дзень выбараў, праглядаць сьпісы выбарнікаў …, працэс захаваньня выбарчых скрыняў учасе некалькіх сутак датэрміновага галасаваньня, сам падлік галасоў у дзень галасаваньня, адпаведны выраб пратаколаў … – усё гэта, праводзіцца ў максымальна магчымым закрытым для назіраньня рэжыме.
Вы можаце сачыць за водгукамі праз RSS 2.0 разсылку. Вы можаце пакінуць водгук, альбо скарыстацца трэкбэкам з вашага уласнага сайта.
Blog…
http://licviny.info/?p=735...