У межах Ініцыятывы “За Эўрапейскі ГОРАД” (Жодзіна) пры падтрымцы барда Кастуся Герашчанкі, ТБМ і БНФ “Адраджэньне” у Жодзіне правялі канцэрт “А Беларусь – ЖЫВЕ!”.
Дадзенае мерапрыемства, ня гледзячы на даволі позьні час, сабрала з паўсотні слухачоў, сярод якіх былі як людзі сярэдняга, гэтак і маладога веку, падлеткі й дзеці.
Канцэрт распачаўся прамоваю Аляксея Лапіцкага, які ў некалькіх словах прадставіў прысутным свайго сябра, таленавітага барда Кастуся Герашчанку, і зьвярнуў увагу аўдыторыі на безкаштоўную сілу мастацтва, якое ўмацовае гэтак патрэбныя кожнаму чалавеку – веру, надзею і любовь, цудатворныя маякі і апоры ў жыцьці кожнага чалавека, здольныя рабіць сапраўды немагчымае …
Было адзначана, што для таго, каб Беларусам адстаяць уласную чалавечую вартасьць і зьберагчы нацыянальныя сьвятыні трэба любіць сваю краіну, верыць у ейную будучыню, у адраджэньне нацыянальнай спадчыны, мовы … традыцыяў эўрапейскасьці.
- Што б не адбывалася, у выніку – перамагае заўсёды любоў і свабода.
Беларусь – была, ёсьць і будзе неад’емнай часткаю Эўропы, дзе каштоўнасьці дэмакратыі ёсьць асноваю для ўстойлівага разьвіцьця грамадзтва, росту эканамікі і разьвіцьця дабрабыту.
Эўрапейскі горад – гэта як зьнешняя ўпарадкаванасьць і чысьціня вуліцаў, кветкі, роўныя тратуары …, але й высокая культура ўзаемаадносінаў, павага да нацыянальных здабыткаў і дэмакратычных каштоўнасьцяў, нацыянальнай гіторыі, мовы … Гэта – утульны дом для ўсіх – месца дзе нараджаюцца і гадуюцца дзеці. Гэта тая атмасфэра дабразычлівай павагі да права кожнага чалавека, у якой можа нармальна і бясьпечна, безканфліктна разьвівацца свабодная і дэмакратычная грамадзкая супольнасьць Беларусі.
З кожнай новай песьняй, якую камэнтаваў сам аўтар-выканаўца, Кастусь Герашчанка, зала напаўнялася ўсё новымі і новымі цёплымі аплядысмэнтамі. Падчас выступу прагучалі шматлікія выдатныя песьні на вершы В. Супруна, А. Сокалава, Ав. Дзеружынскага, В. Шніпа, Г. Бураўкіна, А. Марачкіна, С. Чыгрына, К. Герашчанкі, Зьм. Марозава … з альбому пад назовам “Час выбіраць”, які быў запісаны аўтарам у 2007г.
Фільмам “Беларускамоўны фронт” рэжысэра Віктара Корзуна, быў завершана сустрэча.
Гэта была - сустрэча сяброў, пасьля якой засталіся добрыя эмоцыі і ўражаньні.
Напрыканцы сустрэчы, прысутныя прыдбалі на памяць дыскі зь песьнямі любімага артыста і гурта “Пліса”.
Такім чынам, выдатны восеньскі дзень быў завершаны цёплай сяброўскай вечарынаю, памяць аб якой, думаецца, застанецца у кожнага цудоўным добрым успамінам.
Як ніколі было ясным і зразумелым: Беларусь – Жыве!
Яна дыхае сьвежым паветрам пераменаў, што бяруць пачатак у кожным закаханым у свабоду сэрцы, у думках і надзеях, у нашае веры, якую не здольныя вынішчыць ні пакуты, ні мана, ні здрада …
З кожным сьвежым подыхам прасторы вецер прераменаў напаўняе ветразі нашых мараў і спадзяваньняў, скіроўвае нас у новую будучыню, свабодных і годных людзей, дзяцей сваёй матчыны-Радзімы, незалежнай, вольнай і непадкупнай, непераможнай - адзінай у сьвеце Спадчыны - БЕЛАРУСІ.
