Беларусь мае намер атрымаць астатнюю частку расеійскага крэдыту ў памеры 500 млн. даляраў у траўні гэтага году, паведаміў 30 красавіка журналістам старшыня кіраваньня Нацбанка Пётр Пракаповіч. Па яго словах, адпаведныя папраўкі ў бюджэце Расеі на 2009 год ужо занесеныя, перадае БЕЛАПАН.
Беларусь і Расея ўвосень мінулага году склалі дамову, якая прадугледжвае вылучэньне рэспубліцы стабілізацыйнага крэдыту ў памеры 2 млрд. даляраў у 2008—2009 гадах. Першы транш расеійскага крэдыту ў памеры 1 млрд. даляраў паступіў у Беларусь у канцы лістапада 2008 году; другі — 500 млн. даляраў — у сакавіку 2009 году. Дзяржаўны крэдыт РФ прадстаўляецца Беларусі тэрмінам на 15 год з адтэрміноўкай пагашэньня асноўнага абавязку ў 5 год па стаўцы LIBOR плюс 3% гадавых.
Адносна магчымасьці прыцягненьня іншых расейскіх крэдытаў (у памеры 100 млрд. расейскіх рублёў і 2 млрд. даляраў ад Ашчадбанка або пула банкаў) Пётр Пракаповіч сказаў журналістам, што “гэтыя перамовы ідуць павольна”.
