Абласны сход прадпрымальнікаў у Берасці ўзгадніў тэкст звароту да прэзідэнта, ураду і абласнога Савету дэпутатаў, намеціў план далейшых дзеянняў па абароне свайго бізнэсу.
Сход прадпрымальнікаў напачатку абяцаў быць звычайным, дзелавым. Звыш 30 прадпрымальнікаў сабраліся ў той жа зале спартыўнага комплекса “Алімп”, што і на мінулым тыдні. Акрамя прадпрымальнікаў на сходзе прысутнічаў старшыня РГА “Перспектыва” Анатоль Шумчанка і журналісты. Анатоль Шумчанка зачытаў прысутным падрыхтаваны тэкст звароту да прэзідэнта, ураду і абласнога Савету дэпутатаў, у якім РГА “Перспектыва” прапанавала адмяніць дыскрымінацыйнае, антырынкавае рашэнне Берасцейскага аблвыканкама наконт забароны продажу піва ў шапіках на прыпынках грамадскага транспарту. Тэксты зваротаў былі абмеркаваны, узгоднены і прыняты прадпрымальнікамі.
Пад час зачытвання звароту ў залу ўвайшоў нам. нач. управы прадпрымальнікаў Берасцейскага аблвыканкама Сяргей Юркевіч. Яго выступ паламаў дзелавы, акрэслены стыль сходу і выклікаў шквал эмоцый. Прадпрымальнікі не пагадзіліся з тым, што ў асноўным яны вінаваты ў алкагалізацыі насельніцтва і што людзі стануць менш піць, калі ў іх шапіках не будуць прадаваць піва. Калі ў крамах будуць прадаваць спіртовыя напоі, то не будзе праблем з іх набываннем і ўжываннем. У час фінансавага крызісу , па словах Анатоля Шумчанка, дзяржаве трэба падрыхтавацца да таго, што павялічыцца п’янства. На думку Шумчанка і ягонага намесніка з Берасця Віктара Чайкоўскага, трэба больш увагі ўдзяліць культуры і выхаванню, забараніць распіваць спіртовыя напоі на вуліцах і штрафаваць за парушэнне гэтай забароны. Анатоль Шумчанка даводзіў пра тое, што гэта проста падстава для знішчэння малога бізнэсу ў інтарэсах буйнага. У той час, як прадпрымальнікі нічога не просяць у дзяржавы, спраўна плацяць падаткі, утрымліваюць сябе і свае сем’і, ствараюць працоўныя месцы, падаткавым ёсць з каго “здзіраць” штрафы. Чыноўнікі рэжуць курыцу, якая нясе залатыя яйкі. Прысутны на сходзе юрыст-праваабаронца Уладзімір Малей не пагадзіўся з Юркевічам, што рашэнне аблвыканкама законнае, паколькі яно не зарэгістравана ў дзяржаўным рэестры. Яшчэ Юркевіч прапанаваў прадпрымальнікам перапрафілявацца. Што выклікала абурэнне. Бо не так проста гэта зрабіць, тым больш пры цяперашнім неспрыяльным інвестыцыйным клімаце.
У рэшце рэшт чыноўнік пагадзіўся, што ёсць пытанні для абмеркавання. Вырашана,што дэлегацыя прадпрымальнікаў 4 мая будзе прысутнічаць на прэс-канферэнцыі, зладжанай з гэтай нагоды. 5 мая прадпрымальнікі дружна прынясуць зварот у аблвыканкам. Калі пытанне не будзе вырашана станоўча, звароты гэтак жа дружна будуць дастаўлены прэзідэнту і ўраду.
Трэба адзначыць, што Анатоль Шумчанка дамовіўся на сустрэчу з старшынёю абласнога Савета дэпутатаў Ашмянцавым. Пазней гэтае рашэнне было адмененае, аб чым паведамілі Шумчанку па тэлефоне.
Не абыйшлося і без скандалу. Нам. дырэктара “Алімпа” Людміла Шаўчук дзейнічала не горш КДБ. Забараняла браць інтэрв’ю ва ўдзельнікаў сходу ў вестыбюлі, дапытвалася прозвішчы ў прысутных, шкадавала, што здала залу ў арэнду. Здзіўляла нервовая рэакцыя кіраўніцы, у той час як мінулым разам усё было цывілізавана.
Ганна Васілевіч. Радыё Рацыя. Берасце
Правапіс першакрыніцы
