Кіраўнік МЗС Нідэрляндаў разлічвае, што беларускі дыктатар усёткі не прыедзе на саміт ЕЗ у Празе 7 траўня. І тым самым, на думку Максіма Фэрхагена, праца саміту праграмы «Усходняе партнэрства» ня будзе паралізаваная, перадае «Радыё Свабода».
Кіраўнік МЗС Нідэрляндаў спадзяецца, што той сыгнал, які паслалі ў Менск эўрапейскія дыпляматы, усёткі дайшоў да беларускага кіраўніка. Паводле ягоных словаў, тое запрашэньне, якое атрымалі ў Менску, адрасаванае Беларусі, а не Лукашэнку.
«Нідэрлянды не вітаюць прыезд Лукашэнкі ў Прагу», — адзначыў Фэрхаген.
«Мы не павінны даваць нейкія палітычныя плятформы й рабіць выгляд, што ў Беларусі ўсё добра ў накірунку правоў чалавека й дэмакратыі», — падкрэсьліў галяндскі міністар.
Нагадаем, што днямі Вярхоўны прадстаўнік Эўразьвязу па пытаньнях зьнешняй палітыкі й палітыкі бясьпекі Хаўер Саляна заявіў, што разьлічвае, што прэзыдэнты Беларусі й Малдовы Аляксандар Лукашэнка й Уладзімер Варонін ня прымуць удзел ва ўстаноўчым саміце палітыкі «Усходняе партнэрства» 7 траўня ў Празе. Такое меркаваньне ён выказаў журналістам 27 красавіка ў Люксэмбурзе пасьля заканчэньня сустрэчы кіраўнікоў МЗС краінаў ЕЗ, паведамляе агенцыя БелаПАН з спасылкаю на «Франс Прэс».
Крыніца: Радыё «Свабода»
