Рашэнне суду наконт прэтэнзій раённых уладаў да пробашча каталіцкай парафіі ксяндза Віталя Мышоны будзе вынесенае ў пятніцу.
Сёння лельчыцкі раённы суд разгледзеў прэтэнзіі раённых уладаў да пробашча каталіцкай парафіі ксяндза Віталя Мышоны. Раённы архітэктар склаў у адносінах да ксяндза адміністратыўны пратакол за нібыта самавольнае ўсталяванне крыжа. Начальнік землеўпарадкавальнай і геадэзічнай службы Лельчыцкага раёну яшчэ ў студзені аформіў на адрас ксяндза прадпісанне з патрабаваннем або знесці крыж, або аформіць адвод зямлі пад яго ўсталяванне. Па словах ксяндза Мышоны, судовае рашэнне будзе агучанае ў пятніцу 20 лютага.
Нагадаем, што ў кастрычніку мінулага году каталіцкі крыж на ўездзе ў Лельчыцы быў усталяваны з дазволу мясцовых уладаў. Пазней чыноўнікі райвыканкаму пачалі выстаўляць ксяндзу дадатковыя ўмовы. Справа дайшла да суду, які ўзяў бок святара, але ўлады не спыніліся — пробашча звінавацілі ў невыкананні прадпісанняў органаў улады. Некалькі судовых паседжанняў не адбылася з прычыны няяўкі ў суд архітэктара, які на той момант знаходзіўся на вайсковых зборах.
Крыніца: «Наша Ніва».
