Акцыя памяці адваката Станіслава Маркелава й журналісткі Настасьці Бабуравай прайшла ў Менску 1 лютага.
У 19 гадзінаў каля 15 маладых людзей пашыхтаваліся зь свечкамі й партрэтамі загінулых насупраць будынку расейскае амбасады ў Менску, пасьля чаго перайшлі пад сьцены будынку. Супрацоўнікі аховы спрабавалі перашкодзіць у правядзеньні акцыі, аднак ім гэта не ўдалося. Маладыя людзі тлумачылі міліцыянтам, што выказваюць салідарнасьць з расейскай грамадзянскай супольнасьцю й выступаюць супраць забойстваў журналістаў і юрыстаў у Расеі ды сьвеце.
Супрацоўнікі міліцыі перапісалі пашпартныя дадзеныя ўдзельнікаў акцыі. Прастаяўшы паўгадзіны, маладыя людзі загасілі сьвечкі, згарнулі партрэты загінулых і разыйшліся.
19 студзеня недалёка ад станцыі мэтро “Крапоткінская” у Маскве быў застрэлены адвакат Станіслаў Маркелаў, пазаштатная карэспандэнтка “Новай газэты” Настасься Бабурава, якая знаходзілася зь ім была сьмяротна параненая. Па факце забойства З.Маркелава сьледчы камітэту пры пракуратуры РФ па горадзе Маскве ўзбудзіў крымінальную справу.
С.Маркелаў нарадзіўся 20 траўня 1974 года ў Маскве. У 1996 годзе скончыў Маскоўскую дзяржаўную юрыдычную акадэмію. З 1997 года працаваў адвакатам Межрэспубліканскай калегіі адвакатаў. Зьяўляўся сябрам Міжнароднага зьвязу адвакатаў і Міжнароднага клюбу адвакатаў. З 2006 года быў прэзыдэнтам Інстытута верхавенства права.
Праводзіў праўныя канфэрэнцыі, чытаў лекцыі ў Бэрліне, Мальме, Санкт-Пецярбурзе, Маскве, Кіеве, Менску, на Паўночным Каўказе.
З 1997 года С.Маркелаў актыўна працаваў у Беларусі ў сувязі з адбываўшыміся там вулічнымі акцыямі й ціскам на апазыцыю. Быў міжнародным назіральнікам на прэзыдэнскіх выбарах у Беларусі 2001 года.
Акцыі памяці С.Маркелава й А.Бабуравай прайшлі 1 лютага ў розных краінах сьвету, паведамляе БЕЛАПАН.
Падрыхтаваў,
Алесь Лета,
Licviny-INFA
