Нагадаем, мясцовыя ўлады дамагаюцца зносу каталіцкага крыжа, які ўсталяваны на ўездзе ў Лельчыцы, што ў Гомельскай вобласці.
Зазначым, што ў кастрычніку 2008 года пробашч парафіі Найсвяцейшага Сэрца Езуса і Маці Божай Фацімскай ксёндз Віталь Мышона атрымаў ад гэтых жа ўладаў дазвол на ўсталяванне крыжа ў гонар святога Канстанціна.
Усталяванне крыжа было ўзгодненае ў ДАІ і ДСУ.
Але потым у ксяндза Мышоны пачаліся праблемы з ідэалагічным аддзелам райвыканкаму. Спачатку яму паведамілі, што ўсталяванне крыжа патрабуе яшчэ і ўзгаднення з раённым архітэктарам. Айцец Віталь кажа, што нічога не меў супраць, але раённы архітэктар неўзабаве заявіў, што складае пратакол за тое, што ксёндз не ўзгадніў з ім пытанне.
Парафіі прадпісалі да 30 студзеня вызваліць зямлю, дзе стаіць крыж, то бок знесці яго.
- Самі мы яго ніколі не знясем, - заявіў “Мы” ксёндз Віталь Мышона.
Заўважым, што парафія ў Лельчыцах складае каля 350 каталікоў. Раён пераважна праваслаўны, але, як слушна заўважае вядомы журналіст Андрэй Пачобут у сваім ЖЧ, “нам цяпер на Гарадзеншчыне пачаць абурацца на праваслаўныя крыжы, якія абсалютна натуральна стаяць побач з каталіцкімі? Я думаю, што абурацца на каталіцкі крыж, усталяваны ксяндзом на ўедзе ў Лельчыцы, могуць толькі “праваслаўныя атэісты”, большасць з якіх працуе ў абл- і райвыканкамах”.
Ідэолагі Лельчыцкага райвыканкама сёння аказаліся не на працоўных месцах – так патлумачылі іх падначаленыя. Але адзін з чыноўнікаў заявіў “Мы”, што справа пра крыж надуманая.
- Першы раз чую пра нейкі там канфлікт з-за крыжа. Ніколі нічога такога вакол рэлігійных поглядаў у Лельчыцах і не было. У нас – усё спакойна.
У прэс-службе Рыма-Каталіцкага Касцёла на Беларусі пакуль не каментуюць сітуацыю. Адпаведна, не рыхтуюцца і заявы ад імя Касцёла.
У Курыі Пінскай дыяцэзіі таксама ад каментароў пакуль адмаўляюцца.
Пётр КУХТА
“МЫ”
