Падчас сустрэчы А.Лябедзька паведаміў Я.Ленарчычу аб дзеяньнях Аб’яднаных дэмакратычных сілаў Беларусі (АДС), накіраваных на зьмену выбарчага заканадаўства, у прыватнасьці аб ініцыятыве АДС па рэалізацыі права заканадаўчай ініцыятывы.
“Ленарчыч ўзьнімаў гэтае ж пытаньне на сустрэчы з Макеям, які абяцаў прасунуць пытаньне з прадстаўленьнем памяшканьня для правядзеньня збору ініцыятыўнай групы”, - сказаў палітык.
“Таксама мы акцэнтавалі ўвагу на тым, што праца над зьменаю выбарчага заканадаўства немагчымая без уліку меркаваньняў палітычных партыяў. Я.Ленарчыч пагадзіўся з гэтым”, - паведаміў А.Лябедзька.
У сустрэчы з беларускага боку таксама ўдзельнічалі першы намесьнік старшыні Партыі БНФ Вінцук Вячорка, лідэр Партыі камуністаў Беларускай Сяргей Калякін, лідэр руху “За волю” Аляксандар Мілінкевіч, старшыня Беларускай сацыял-дэмакратычнай партыі (Грамада) Анатоль Ляўковіч і галава аргкамітэту па стварэньні “Народнай Грамады” (Беларуская сацыял-дэмакратычная партыя) Мікалай Статкевіч.
У першы ж дзень свайго візыту ў Менск дэлегацыя БДІПЧ АБСЭ правяла сустрэчы ў ЦВК, Адміністрацыі прэзідэнта й Міністэрстве замежных справаў.
На сустрэчы ў Цэнтравыбаркаме абмяркоўваліся пытаньні ўдасканаленьня беларускага выбарчага заканадаўства.
Па словах старшыні ЦВК Лідзіі Ярмошынай, было дасягнута паразуменьне аб неабходнасьці стварэньня экспэртнай групы па ўкараненьні рэкамэндацый БДІПЧ АБСЭ у беларускае выбарчае заканадаўства на базе Нацыянальнага цэнтру заканадаўства й праўных дасьледаваньняў з удзелам экспэрта БДІПЧ АБСЭ Матса Ліндбэрга.
“Дадзеная група будзе працаваць над магчымасьцю ўкараненьня тых прапаноў АБСЭ, якія датычацца выбарчага заканадаўства”, - цытуе галава ЦВК агенцыі “Інтэрфакс-Захад”. Лідзія Ярмошына адзначыла, што “праца групы пачнецца ў лютым пасьля правядзеньня намі выніковае нарады з арганізатарамі выбараў на месцах, на якой будзе абмеркаваная выніковая справаздача АБСЭ па парлямэнскіх выбарах 2008 года”.
Падчас сустрэч зь Я.Ленарчычам былі абмеркаваныя выніковая справаздача АБСЭ й тыя крокі, якія “мае намер распачаць Беларусь па выкананьні тых рэкамэндацыяў, якія выказаныя АБСЭ ў заключнае справаздачы”.
Нагадаем, што ў выніковым дакладзе БДІПЧ аб парлямэнскай выбарчай кампаніі 2008 года ў Беларусі гаворыцца, што нягледзячы на “некаторыя паляпшэньні” выбары не адпавядалі стандартам АБСЭ.
Па меркаваньні экспэртаў, беларускае выбарчае заканадаўства не дае магчымасьці для “сапраўднай палітычнай канкурэнцыі й роўнага стаўленьня да кандыдатаў з боку ўладаў”, “перашкаджае ў правядзеньні выбараў” у адпаведнасьці з дэмакратычнымі стандартамі. Выбарчы кодэкс “не забясьпечвае празрыстага мэханізму захаванасьці вурнаў зь бюлетэнямі пасьля пачатку датэрміновага галасаваньня, а таксама мэханізму абароны самога бюлетэня”.
“Мы выказалі сваю пазыцыю, меркаваньні па справаздачы АБСЭ, у тым ліку крытычныя заўвагі, якія ў нас меліся”, - сказала Л.Ярмошына.
Старшыня ЦВК падкрэсліла, што “Беларусь упершыню не будзе накіроўваць свае пярэчаньні па справаздачы АБСЭ. Таму што мы зыходзім, першым чынам, з мэтазгоднасьці, неабходнасьці наладжваньня дыялёгу Беларусі й АБСЭ, у тым ліку й па пытаньнях арганізацыі й правядзеньня выбараў”.
Л.Ярмошына лічыць, што ўдасканальваць выбарчае заканадаўства Беларусі “на ўзроўні праваўжывальнае практыкі немагчыма”. “Ускладаць усё на Цэнтарвыбаркам было б няправільным. Думаю, што, хутчэй за ўсё, будзе йсці двуадзіны працэс - удасканаленьне практыкі, і, мусіць, у чымсьці будзе зьмяняцца выбарчае заканадаўства”, - заявіла старшыня Цэнтарвыбаркаму Беларусі.
Учора ж дэлегацыя БДМПЧ АБСЭ правяла сустрэчу з галавою Адміністрацыі прэзыдэнта Ўладзімерам Макеем.
Бакі адзначылі нацэленасьць на практычнае ўзаемадзеяньне пры разглядзе рэкамэндацыяў і прапановаў АБСЭ пры ўдасканаленьні выбарчага заканадаўства Беларусі й праваўжывальнае практыкі ў дадзенай вобласьці, паведамляе БЕЛТА.
Янэз Ленарчыч выказаў гатовасьць да цеснага супрацоўніцтва й аказаньня экспэртнага садзеяньня Нацыянальнаму цэнтру законапраектнай дзейнасьці й Выбаркаму Беларусі. Ён таксама з задавальненьнем адзначыў гатовасьць Беларусі да супрацоўніцтва й пазытыўна ацаніў створаныя беларускім бокам умовы для працы дэлегацыі.
Дмитрий СЕРГЕЙЧИК, “Белорусские новости”
Падрыхтаваў Алесь Лета, Licviny-INFA
